នៅព្រឹកថ្ងៃទី៦ ឧសភា ឆ្នាំ ២០២២ ឯកឧត្តមបណ្ឌិតតាំង ងួនលី នាយកប្រតិបត្តិនៃមជ្ឈមណ្ឌលបណ្តុះធុរកិច្ចថ្មី “តេជោ” បានដឹកនាំក្រុមការងារមកធ្វើទស្សនកិច្ចសិក្សាស្វែងយល់ និងពិភាក្សាកិច្ចសហប្រតបត្តិការងារជាមួយសាកលវិទ្យាល័យបច្ចេកវិទ្យា និងវិទ្យាសាស្រ្តកម្ពុជា(ខេមតិច)។

ជំនួបពិភាក្សានេះបានសង្កត់ធ្ងន់ទៅលើជំនាញឌីជីថលដែលចាំបាច់សម្រាប់សង្គមនៅក្នុងសតវត្សរ៍ទី២១ ការផ្តល់ឱកាសឲ្យនិសិត្សចូលរួមក្នុងកម្មវិធីប្រកួតប្រជែងផ្សេងៗ និងឱកាសនិស្សិតហាត់ការជាមួយនិងមជ្ឈមណ្ឌលបណ្តុះធុរកិច្ចថ្មី“តេជោ”។ ជាមួយគ្នានេះដែរ កិច្ចប្រជុំក៏បានលើកឡើងពីការផ្តោះប្តូរធនធានមនុស្សដែលមានជំនាញរវាងមជ្ឈមណ្ឌលបណ្តុះធុរកិច្ចថ្មីតេជោ និងខេមតិច ហៅថា“Talent Pool” ការសិក្សាស្រាវជ្រាវទៅលើធុរកិច្ច និងបចេ្ចកវិទ្យារបស់ស្ថាប័នទាំងពីរ។

បន្ទាប់ពីកិច្ចពិភាក្សាបានបញ្ចប់គណៈប្រតិភូបានធ្វើទស្សនៈកិច្ចក្នុងបរិវេណសាកលវិទ្យាល័យ ដូចជាសាលប្រជុំ បន្ទប់ពិសោធន៍ និងបន្ទប់អនុវត្តគម្រោងចំនួនបីមានដូចជាគម្រោងបច្ចេកវិទ្យាបញ្ញាសិប្បនិម្មិតដោយការបង្រៀនបើកបរម៉ូតូជាមួយនឹងVR App ការវិភាគរុក្ខជាតិនិងកំណត់បរិមាណជីដោយប្រើប្រាស់ដ្រូន និងកាំម៉ារ៉ាHyperspectral ការរចនាក្នុងអគារដោយប្រើកម្មវិធីAugmented and Mixed Reality។